"गुलाबजाम"

 मित्रांनो... तुम्हाला एक अतिशय सुंदर दृकश्राव्य अनुभव हवाय का?

नक्की जाऊन "गुलाबजाम" हा सिनेमा पहा...
बऱ्याच जणांनी केलेली सोनाली कुलकर्णीची तारीफ, आणि एकंदर या चित्रपटाचं होतं असलेलं कौतुक... असे अनेक घटक मला हा सिनेमा पहाण्यासाठी ढकलत होते... म्हणून मी आणि सौ. नी जाऊन हा सिनेमा आज पाहिला.

सुरवात ज्या धावपळीत होते, तोच वेग कायम ठेवत हे छोटंसं कथानक पुढे सरकत राहतं; आणि तुम्ही मात्र आपल्याच विश्वात त्या कथानकाला गुंफत कुठे तरी हरवून जाताय, असा माझा वैयक्तिक अनुभव होता.

तुमच्या घरापासून, आईपासून दूर कुठे तरी मिळेल ते खाल्लंय का तुम्ही?
उत्तर "हो" असेल... आणि तुम्ही FOODIE म्हणजेच खवय्ये (इन्स्टा वरचे नाही बरं का) असाल तर हा तुमचा चित्रपट आहे, हे नक्की समजा!!!

सिनेमाची समिक्षा लिहिण्याचा माझा मानस नक्कीच नाहीये; पण जे मला अनुभवता आलं, ते तुम्हा सर्वांन पर्यंत पोहोचवावं म्हणून हा खटाटोप.

सुरवातीलाच कुठे तरी "थैकुंडं ब्रिज" चा उल्लेख दिसला, नक्की कळत नाहीये त्यांनी संगीत दिलंय का नाही या बद्दल... पण Background Music अतिशय प्रभावी झालंय, ते चित्रपटामध्ये खूप छान मिसळून सुद्धा गेलंय.

मी स्वतः चित्रपट पहाताना मला त्यात खूप छान फ्रेम्स दिसतातं, बहुतेक मी तसं पाहतो असा म्हणावं लागेल... चित्रपटाची फोटोग्राफी अतिशय सुंदर आहे, आणि ती जाणवायला तुम्ही फार मोठं कला समीक्षक वगैरे असावं लागणार नाहीये इतकं सहज सुंदर झालंय सगळं.

कथानक प्रभावी नसताना सुद्धा, कलाकारांनी चित्रपटाला नक्कीच प्रभावी केलंय; कुठलीच गोष्ट हि खटकतेय अशी वाटणारी नाहीये.

आम्हा दोघांच्या प्रतिक्रिया अग्गदी सारख्याच होत्या... चित्रपटात एका ठिकाणी छान पाऊस पडतो, त्या क्षणापर्यंत तो पाऊस तुमच्या डोळ्यात पण दाटला असेल(?) तर त्याला मोकाट बरसू द्या... खूप मस्त वाटेल...

एक खास गुलाबजाम आहे चित्रपटात, जो सोनाली उचलते आणि त्याचा पाक-थेंब खाली भांड्यात पडतो त्याचा सुद्धा आवाज आहे... तो टिपण्यासारखा आहे.

एकंदर सगळं उत्तम, आणि पैसावसूल आहे... म्हणून हा गुलाबजाम नक्कीच खा!

टीप : वेळे अभावी आणि आमच्या दुर्दैवाने आम्ही अतिशय भंगार ठिकाणी हा चित्रपट पाहिला, पण तुम्ही जिथे उत्तम ध्वनी व्यवस्था असेल अश्याच सिनेमागृहात हा चित्रपट बघा!!!

* मला कोणीही या प्रोमोशनसाठी पैसे दिलेले नाहीयेत!!!